Avropa İttifaqının Azərbaycan nümayəndəliyinin rəsmiləri və BAMF-ın rəhbəri Bərdədə olmuşlar

16 iyul 2018-ci il tarixdə BAMF-ın təşkilatçılığı ilə Avropa İttifaqının Azərbaycan nümayəndəliyinin  rəhbəri cənab Kestutis Yankauskas  və BAMF-ın rəhbəri Umud Mirzəyev  Bərdə rayonunda səfərdə olmuşlar. Səfərdə məqsəd Avropa İttifaqının Azərbaycan hökuməti ilə əməkdaşlıq çərçivəsində Azərbaycanın müharibədən zərərçəkmiş regionlarında sosial biznes və aqro təşəbbüslərin dəstəklənməsi, Azərbaycanın kənd təsərrüfatında innovativ ideyaların dəstəklənməsi və idarəetmənin təkmilləşdirilməsi, Azərbaycanın müharibədən zərərçəkmiş regionlarında mini istehsal sahələrinin yaradılması ilə kənd təsərrüfatının inkişafına dəstək, Aqro və Eko-turizmin inkişafı, Qranadlar əvəzinə narlar layihələrinin Bərdə rayonunda həyata keçirilməsinin perspektivləri ilə tanış olmaq və rayon İcra Hakimiyyəti  ilə danışıqlar aparmaq olmuşdur.
         Qonaqlar öncə   rayon icra hakimiyyətinin başçısı Vidadi İsayevlə görüşmüşlər. Görüşdə rayon İcra Hakimiyyətinin məsul işçiləri   iştirak etmişlər.  Görüş cay süfrəsi ətrafında qarşılıqlı diskussiya və fikir mübadiləsi şəraitində keçmişdir.  
         Sonra nümayəndələr Bərdə  Peşə liseyində olmuş, buradakı iş və təlim şəraiti ilə tanış olmuş, daha sonra Cəyirli kəndində sahibkar  Musa Quliyevin pambıq  sahəsində pambığın becərilməsi ilə maraqlanmış, Bərdə şəhər ərazisindəki qədim abidələr olan Bərdə türbəsi və Torpaq qalada olmuş,  şəhərin mərkəzindəki  Nuşabə parkını  gəzmişlər.