Bərdə şəhidi Məmmədli Namiq Ağəmməd oğlu böyük izdihamla Bəcirəvan kənd qəbirstanlığında torpağa tapşırıldı
16 sentyabr 2022 | 09:59
Bərdənin Mehdili kəndindən olan 02.05.1996-cı il təvəllüdlü MAHHXHQ kiçik çavuş Məmmədli Namiq Ağəmməd oğlu
2022-ci il sentyabrın 12-dən etibarən Ermənistan silahlı qüvvələrinin törətdiyi genişmiqyaslı təxribatların qarşısının alınması zamanı Kəlbəcər rayonu ərazisində şəhid olmuşdur.
Namiq Bərdə rayonunun Mehdili kəndində anadan olub. Azərbaycan Ordusunun Xüsusi Təyinatlı Qüvvələrində xidmət edib. 44 günlük Vətən müharibəsi zamanı da xüsusi şücaət göstərib və döyüş zamanı əməliyyatlarda fərqləndiyinə görə, "Şuşanın azad olunmasına görə", "Füzulinin azad olunmasına görə", "Xocavəndin azad olunmasına görə", "Cəbrayılın azad olunmasına görə", "Kəlbəcərin azad olunmasına görə" medalları ilə, eyni zamanda "Hərbi xidmətdə fərqlənməyə görə" 3-cü dərəcəli medalla təltif edilib.
Türkiyə Respublikasında keçirilmiş təlimlərdə yüksək nailiyyətlər əldə etdiyinə görə "Güclü döyüşçü" medalı ilə mükafatlandırılıb.
Şəhidimizlə vida mərasimi doğulduğu Mehdili kəndində keçirilib. Vida mərasimində şəhidin yaxınları ilə yanaşı, rayon İcra Hakimiyyətinin başçısı Vidadi İsayev, Millət vəkili Fatma Yıldırım, hüquq-mühafizə orqanları, rayonda fəaliyyət göstərən idarə, müəssisə və təşkilatların rəhbər və əməkdaşları, ictimaiyyət nümayəndələri, rayon sakinləri iştirak ediblər. Şəhid Namiq Məmmədli Bərdə rayon Bəcirəvan kənd qəbirstanlığında torpağa tapşırılıb.
Bütün şəhidlərimizə Allahdan rəhmət, ailə üzvlərinə səbir diləyirik! 
Keçidlər
