İctimai Siyasi Proseslər Beynəlxalq Araşdırmalar Mərkəzinin (İSBAM) təşkilatçılığı ilə Bərdə Heydər Əliyev mərkəzində Sübut Mehdiyevin müəllifi olduğu "Tarixin Zəfər Yolu" kitabının təqdimat mərasimi keçirilib
27 fevral 2023 | 17:41
Tədbiri giriş sözü ilə açan Bərdə Rayon İcra Hakimiyyətinin İctimai-siyasi və humanitar məsələlər şöbəsinin baş məsləhətçisi Asif Abbasov qonaqları salamlayaraq kitab haqqında ümumi məlumat vermişdir. Sonra tədbirin təşkilatçısı İSBAM sədri Samir Adıgözəlli çıxış edərək "Tarixin Zəfər Yolu" kitabının gənc nəslin maarifləndirilməsində, şəhidlərimizin xatirəsinin əbədiləşdirilməsində öz töhfəsini verəcəyini bildirmişdir.
Samir Adıgözəlli 44 günlük Vətən müharibəsinin yazıçılar, jurnalistlər, araşdırmaçılar tərəfindən ciddi tədqiq edilməklə tarixləşdirilməsinin zəruriliyini bildirib.
Daha sonra tədbirdə iştirak edən Çexiyada yaşayan professor Azər Kərimov, təhsil işçiləri Leyla Məmmədova, Tamella Əliyeva, şəhid Xudayar Yusifzadənin anası Radə xanım, şəhid Fəxri Qəribzadənin anası Mehbarə xanım, şəhid Elməddin Hüseynzadənin anası Arzu xanım, şəhid Turqut Zeynalovun anası Zibeyde xanım və şəhid Səid Əbilovun anası Əzizə xanım çıxış edərək işiq üzü görən kitabın müəllifi Sübut Mehdiyevə və tədbirin təşkilatçılarına təşəkkürlərini bildiriblər.
Çıxışçılar qeyd etdilər ki, hər bir şəhidin xatirəsinə belə dəyərli kitabların həsr olunması cəmiyyət qarşısında böyük xidmətdir.
Müəllif Sübut Mehdiyev çıxış edərək kitabın məzmun və ideya xətti barədə iştirakçıları məlumatlandırdı. O, zəfərə gətirən yolda qəhrəman Vətən oğullarının şücaətlərini qələmə almaqla ilk növbədə öz mənəvi borcunu yerinə yetirdiyini qeyd edib. S.Mehdiyev bundan sonra da 30 il işğalda olan Qarabağın azadlığı uğrunda əməyi, zəhməti keçən hər bir qəhrəmanın döyüş yolunu öz qələmi ilə tarixləşdirəcəyinə söz verdi.
Sonda müəllif tərəfindən iştirakçılara kitablar imzalanaraq təqdim edildi.
İSBAM -ın təşkilatçılığı ilə keçirilən təqdimat mərasimində rayon ziyalıları, qazi və şəhid ailələri iştirak etmişlər.
Keçidlər
