Kürdborakı kəndində rayon İcra Hakimiyyəti başçısının səyyar qəbul-görüşü keçirilmişdir
Qəbulda rayon İcra Hakimiyyətinin başçısı, hüquq-mühafizə orqanlarının, təhsil, səhiyyə, mədəniyyət, xidmət təşkilatlarının rəhbərləri və kənd sakinləri iştirak etmişlər.
Rayon İcra Hakimiyyətinin başçısı Vidadi İsayev çıxış edərək Azərbaycan Respublikasının Prezidentinin göstərişi əsasında keçirilən səyyar qəbul-görüşlərin vətəndaşları narahat edən məsələləri bilavasitə yerdə öyrənmək və onların həllini təmin etmək olduğunu bildirdi, ölkəmizdə, rayonumuzda və Kürdborakı kəndində həyata keçirilən tədbirlər, görülən işlər barədə qısa məlumat verdi.
Son illər kənd qazlaşdırılıb, kəndin də istifadə etdiyi Yeni Daşkənd-Umudalılar kəndlərarası yol yenidən qurulub, yol boyu elektrik və qaz xətləri texniki normaya gətirilmiş, ərazidə abadlıq işləri aparılmış, təsərrüfatdaxili 3 km arxlar lildən təmizlənmiş, 2 ədəd subartezian quyusu qazılıb istifadəyə verilmişdir.
2022-ci ildə 254 hektar sahədə pambıq əkilmiş, hər hektardan 39 sentner olmaqla 1000 ton pambıq istehsal edilmişdir. 2023-cü ildə 100 hektar sahədə pambıq əkilməsi nəzərdə tutulmuş, indiyədək 31 nəfər fermer pambıq əkilməsi üçün istehsal müəssisələri ilə müqavilə bağlanmış, sahələr şumlanmışdır.
Sonra vətəndaşların müraciətləri dinlənilmişdir. İldırım Hüseynov Kürdborakı kəndinin elektrik enerjisinin verilməsində fasilələr yarandığı üçün kəndin elektrik şəbəkəsinin yenidən qurulması, Nəzakət Verdiyeva və Kürdborakı kənd tam orta məktəbin digər 3 müəllimi fərdi yaşayış evlərinə telefon və internet xəttinin çəkilməsi, Güloğlan Rəşidli 2022-ci ilin 21 dekabr tarixində özünə məxsus 1 ədəd iribuynuzlu heyvanın İnzibati ərazi dairəsinin Şatırlı kəndi ərazisində yolun kənarında minik avtomobili tərəfindən vurulduğu, Səbuhi Səlimov özünün və həyat yoldaşının qan xəstəliyi olduğunu bildirərək müalicə olunmasına kömək göstərilməsi və maddi vəziyyətinin çətin olduğunu bildirərək birdəfəlik maddi yardım edilməsi, Elbrus Rüstəmov Kürdborakı kəndində “Örüş yeri” adlanan ərazidə 52 ha sahədə əkin sahələrinin suvarma suyu ilə təminatının yaxşılaşdırılması üçün 1 ədəd subartezian quyusunun qazılması, Fazil Əmirov Kürdborakı-Birinci Qazaxlar kəndlərarası yolun kənarında 45 ha sahədə əkin sahələrinin suvarma suyu ilə təminatının yaxşılaşdırılması üçün 1 ədəd subartezian quyusunun qazılması, Cabbar Cabbarov Kürdborakı kəndinin kənarında subartezian quyusundan ətrafdakı əkin sahələrinə suvarma suyunun paylanması üçün Yeni Daşkənd-Umudalılar kəndlərarası yolun həmin ərazidən keçən hissədə yeraltı su keçidinin verilməsi, Vətən müharibəsi şəhidinin atası Şamil Abbasov Kürdborakı kənd tam orta məktəbinin əsaslı təmir olunması barədə müraciətlər etmişlər. Müraciətlərlə əlaqədar tədbirlər görülmüş, aidiyyəti qurumlara müvafiq tapşırıqlar verilmiş, vətəndaşlara hüquqi yardım göstərilmiş, müvafiq izahatlar verilmişdir.
