Qaraqoyunlu kəndində rayon İcra Hakimiyyəti başçısının səyyar qəbul-görüşü keçirilmişdir
06 dekabr 2023 | 10:15
Qəbulda rayon İcra Hakimiyyətinin başçısı, hüquq-mühafizə orqanlarının, təhsil, səhiyyə, mədəniyyət, xidmət təşkilatlarının rəhbərləri və kənd sakinləri iştirak etmişlər.
Rayon İcra Hakimiyyətinin başçısı Vidadi İsayev çıxış edərək Azərbaycan Respublikasının Prezidentinin göstərişi əsasında keçirilən səyyar qəbul-görüşlərin vətəndaşları narahat edən məsələləri bilavasitə yerdə öyrənmək və onların həllini təmin etmək olduğunu bildirdi, ölkəmizdə, rayonumuzda və Qaraqoyunlu kəndində həyata keçirilən tədbirlər, görülən işlər barədə qısa məlumat verdi.
Son illərdə İnzibati ərazi dairəsinin bütün kəndləri qazlaşdırılıb, Güloğlular-Qaraqoyunlu kəndlərarası 1.5 km yol qum-çınqılla əsaslı təmir edilib, magistral yoldan Qaraqoyunlu kəndinin mərkəzinədək 500 metr yol asfaltlaşdırılıb,kənddaxili 10 km suvarma arxları və drenajlar lildən təmizlənib.
2022-ci ildə 60 hektar pambıq əkilmiş, hər hektardan 30 sentner olmaqla 180 ton pambıq istehsal edilmişdir. 2023-cü ildə isə 60 hektar pambıq əkilmiş ümumilikdə 33 sentner olmaqla 198 ton pambıq istehsal edilmişdir. 2 kümçü tərəfindən 7 qutu ipək qurdu bəslənmiş 300 kq barama istehsal edilmişdir.
Sonra vətəndaşların müraciətləri dinlənilmişdir. Kənd sakinləri, Zeynəb Quliyeva cari ilin 2 avqust tarixində Yuxarı-Qarabağ kanalının Qaraqoyunlu kəndi ərazisindən keçən hissəsində torpaq bəndin 8 metr hissəsinin yuyulması nəticəsində baş vermiş su daşqınının özünə məxsus fərdi yaşayış evinə ziyan vurduğu üçün evin təmirinə köməklik göstərilməsi, Çiçək Quliyeva Vətən müharibəsinin iştirakçısı olan oğlunun işlə təmin olunması, Yusif Məmmədov Güloğlular-Qaraqoyunlu kəndlərarası 1.5 km yolun qum-çınqılla təmir olunması, Arzuman Şükürov kəndin elektrik enerjisinin verilməsində fasilələr yarandığı, həmçinin dirəklər və naqillərin köhnə olduğu üçün elektrik şəbəkəsinin yenidən qurulması, Yusif Quliyev internet ilə təminatın yaxşılaşdırılması, Ramil Ağayev və Qubad Əhmədov daşqın zamanı həyətyanı təsərrüfatına ziyan dəydiyi üçün birdəfəlik maddi yardım edilməsi barədə müraciətlər etmişlər.
Müraciətlərlə əlaqədar tədbirlər görülmüş, aidiyyəti qurumlara müvafiq tapşırıqlar verilmiş, vətəndaşlara hüquqi yardım göstərilmiş, müvafiq izahatlar verilmişdir.
Keçidlər
