Vətən müharibəsi şəhidlərinin doğum günü mərasimi keçirilib
06 may 2024 | 17:52
Şəhid Həsənov Azər Aydın oğlunun, Abbasov Elvin Şamil oğlunun və Əhmədov Cavanşir Elxan oğlunun doğum günü münasibətilə məzarları ziyarət edilib, xatirələri ehtiramla anılmışdır. Mərasimdə rayon İcra Hakimiyyətinin əməkdaşları, rayon ictimaiyyəti, şəhid ailələri və veteranlar, qazilər iştirak etmişlər.
Qeyd edək ki, çavuş Həsənov Azər Aydın oğlu 06.05.1982-ci il tarixində Bərdə rayon İkinci Qaradəmirçi kəndində anadan olub. 2020-ci il sentyabr ayının 27-də düşmənin törətdiyi təxribata qarşı əks-hücuma başlanan Vətən müharibəsində Suqovuşanın azad edilməsində iştirak etmiş və elə orada şəhidlik zirvəsinə ucalmışdır. Azərbaycan Respublikasının Prezidentinin müvafiq Sərəncamı ilə Çavuş Həsənov Azər Aydın oğlu ölümündən sonra “Vətən uğrunda” ,“Suqovuşanın azad olunmasına görə” və "Cəsur döyüşçü" medalları ilə təltif edilmişdir.
Əsgər Əhmədov Cavanşir Elxan oğlu 06.05.2001-ci il tarixində Bərdə rayon Alpout kəndində anadan olub. 2020-ci il sentyabr ayının 27-də düşmənin törətdiyi təxribata qarşı əks-hücuma başlanan Vətən müharibəsində Laçının azad edilməsində iştirak etmiş və elə orada şəhidlik zirvəsinə ucalmışdır. Azərbaycan Respublikasının Prezidentinin müvafiq Sərəncamı ilə Əsgər Əhmədov Cavanşir Elxan oğlu ölümündən sonra , “Vətən uğrunda”, “Hərbi xidmətlərə görə”, “Cəbrayılın azad olunmasına görə”, “Qubadlının azad olunmasına görə”, “Laçının azad olunmasına görə” medalları ilə təltif edilmişdir.
Əsgər Abbasov Elvin Şamil oğlu 1992-ci il mayın 6-da Ağdərə rayonunun Umudlu kəndində anadan olub. Noyabrın 7-də Şuşa istiqamətində gedən döyüşlər zamanı qəhrəmancasına şəhid olub. Noyabr ayının 11-də Bərdə rayonunun Hacılı kəndində dəfn olunub.
Şəhid Abbasov Elvin 44 günlük Vətən müharibəsində gedən döyüşlərdə göstərdiyi igidliyə görə Azərbaycan Respublikasının Prezidenti cənab İlham Əliyevin müvafiq sərəncamına əsasən ölümündən sonra "Şuşanın azad olunmasına görə" və “Vətən uğrunda” medalları ilə təltif olunub.
Allahdan bütün şəhidlərimizə rəhmət, qazilərimizə can sağlığı diləyirik.
Keçidlər
