Avropa İttifaqının Cənubi Qafqaz üzrə xüsusi nümayəndəsi Herbert Salberin rəhbərlik etdiyi nümayəndə heyəti oktyabrın 27-də Bərdədə 588 məcburi köçkün ailəsi üçün salınan yaşayış məhəlləsində yaradılan şəraitlə tanış olub, məcburi köçkünlərlə görüşmüşdür.

Avropa İttifaqının Cənubi Qafqaz üzrə xüsusi nümayəndəsi Herbert Salberin rəhbərlik etdiyi nümayəndə heyəti oktyabrın 27-də Bərdədə 588 məcburi köçkün ailəsi üçün salınan yaşayış məhəlləsində yaradılan şəraitlə tanış olub, məcburi köçkünlərlə görüşmüşdür.Tədbirdə Azərbaycan Respublikası Baş nazirinin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov və Bərdə rayon cra Hakimiyyətnin başçısı Vidadi İsayev  iştirak etmişlər.
Görüşdə məcburi köçkünlər problemlərinin həlli, yaşayış şəraitlərinin yaxşılaşdırılması istiqamətində Azərbaycan dövlətinin həyata keçirdiyi tədbirlərdən razılıqlarını ifadə etmşlər. Ağdam rayonundan məcburi köçkün Ziyafət İsmayılov, Xocalıdan olan məcburi köçkün Elman Türbəndiyev, Kəlbəcər rayonundan məcburi köçkün Şakir Camalov və başqaları bildirmişlər  ki, Azərbaycan dövləti qaçqın və məcburi köçkün həyatı yaşayan vətəndaşlarına daim diqqət və qayğı göstərir. Yaşayış məhəlləsində məcburi köçkünlər üçün hər cür şərait yaradılıb. Ancaq məcburi köçkünlərin ən böyük istəyi öz doğma yurdlarına qayıtmaqdır.
Məcburi köçkünlər, həmçinin qeyd etmişıər ki, Şahbaz Quliyev və Dilqəm Əsgərov 2014-cü ilin iyulunda doğma torpaqlarında yaxınlarının qəbirlərini ziyarət edən zaman Ermənistan tərəfindən girov götürülüblər. Onlar bu gün də düşmən əsirliyindədirlər. Şahbaz Quliyev və Dilqəm Əsgərovun azad edilməsi üçün beynəlxalq təşkilatlar tərəfindən hələ də ciddi addımlar atılmayıb.
Ağdam rayonundan olan məcburi köçkün Çimnaz Hüseynova isə avropalı diplomatın diqqətinə çatdırmışdır ki, işğal olunmuş ərazilərimizdə ata-babalarının məzarları, dini ibadət yerlərimiz, o cümlədən məscidlər yerlə-yeksan edilib. Ancaq bu gün Bakıda erməni kilsəsi qorunub saxlanılır. Bu isə xalqımızın tolerantlıq ənənələrinin göstəricisidir.
Herbert Salber qeyd etmişdir ki, Azərbaycana dəfələrlə səfər etsə də, Bakıdan kənarda məcburi köçkünlərlə ilk dəfədir görüşür. “Məcburi köçkünlərin həyat şəraiti ilə yaxından tanış olmaq, onların problemlərini dərindən öyrənmək mənim üçün böyük əhəmiyyət kəsb edir”, - deyə xüsusi nümayəndə vurğulamışdır.
Məcburi köçkünlər görüşün keçirildiyi saatlarda da erməni silahlı qüvvələri tərəfindən cəbhə xəttində atəşkəsin pozulduğunu Avropa İttifaqının Cənubi Qafqaz üzrə xüsusi nümayəndəsinin diqqətinə çatdırmışlar.
Sonra avropalı qonaq yaşayış məhəlləsindəki tam orta məktəbdə yaradılan şəraitlə maraqlanmışdır. Məcburi köçkün uşaqlarla görüş zamanı şagirdlər öz doğma torpaqlarına qayıdaraq, orada təhsil almaq istədiklərini bildirmişlər.
Daha sonra körpələr evi-uşaq bağçasında yaradılan şəraitlə tanışlıq olmuş, Ağdam rayonundan məcburi köçkün Zərifə Camalovanın mənzilinə baş çəkilmişdir.
Məlumat verilmişdir ki, yaşayış kompleksində 588 mənzil, 640 şagird yerlik məktəb, 140 yerlik uşaq bağçası, ATS və digər inzibati binalar tikilmişdir. Yaşayış məhəlləsi bütün infrastrukturla təmin olunmuşdur.
Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov ərazidə məskunlaşan məcburi köçkünlərlə görüşüb, onların problem və təkliflərini dinləmiş, qaldırılan məsələlərin həllinin diqqətdə saxlanılacağını bildirmişdir.
Jurnalistlərlə təəssüratlarını bölüşən Herbert Salber məcburi köçkünlər üçün gözəl şərait yaradıldığını bildirmiş: “Hiss edirəm ki, region böyük narahatlıq doğuran regiondur. Məcburi köçkünlərin şəraitini gözlərimlə gördüm. Səfər nəticəsində ətraflı məlumat əldə etdim. Burada lazımi şərait yaradılıb. Məcburi köçkünləri çox gözəl anlayıram. Onların əsas istəyi doğma torpaqlarına qayıtmaqdır”.
Avropa İttifaqının Cənubi Qafqaz üzrə xüsusi nümayəndəsi bildirmişdir ki, münaqişə sülh yolu ilə həll olunmalıdır. “Biz regionda heç bir hərbi qarşıdurma istəmirik. Çünki hərbi münaqişədən günahsız insanlar, mülki əhali ziyan çəkir. Avropa İttifaqı olaraq münaqişənin sülh yolu ilə həllinə dəstək göstərməyə hazırıq”, – deyə Herbert Salber vurğulamışdır.